МОЛИТВЫ КО ПРЕСВЯТОЙ БОГОРОДИЦЕ НА ВСЯКИЙ ДЕНЬ СЕДМИЦЫ
ПОДВИЖНИКА НИЛО-СОРСКОЙ ПУСТЫНИ ИЕРОСХИМОНАХА НИЛА
В ЧЕТВЕРГ
Кто Тебе по достоянию ублажити может Пресвятая Дево, кии уста воспети способны Твое величие, всяк смысл превосходящее? Вся преславная о Тебе содеянная таинства, Богородице, выше смысла и слова суть; красоте Девства Твоего и пресветлой чистоте Твоей удивишася Херувими и ужасошася Серафимы; чудесе бо рождества Твоего нетленнаго ни человеческий, ни ангельский язык изрещи может. От Тебе бо безлетный и единородный Сын Божий, Бог Слово, неизреченно воплощся, родился и с человеки поживе, и Тя, яко Матерь Свою, зело возвеличи, Царицу Тя всея твари показа, нам же известное спасения пристанище. Тем вси под кров Твой притекающий, различными скорбями и болезнями одержимии, приемлют от Тебе богатно утешение и исцеление, и Тобою от бед спасаются: Ты бо воистину Мати всех скорбящих и обремененных, печальных радость, больных целительница, юных хранительница, старости жезл, праведных похвала, грешных спасения надежда и к покаянию путеводительница: всем бо всегда предстательством Твоим помогаеши и всех заступаеши Всеблагая, прибегающих к Тебе с верою и любовию. Ты и мне помози отчаянному деяний моих ради, Заступнице усердная рода христианскаго; заступи мя, да не до конца погибну во гресех; ибо не имам иного прибежища и покрова, разве Тебе, Владычице Мати Живота; не остави убо мене и не презри мя, но ими же Сама веси судьбами, спаси мя, яко благословенна еси во веки веков. Аминь.

Православная энциклопедия ,,Элпис''